Song 5 | NdeIBE | STEP | Sengingenile esivandeni sami, dadewethu, mlobokazi wami; sengiyibuthile imure yami lesiyoliso sami. Sengizidlile izinhlanga zami loluju lwami; sengiyinathile iwayini yami lochago lwami. Dlanini, we zihlobo, linathe; nathani lizidele, lina zithandani.

Song of Solomon 5

Umyeni

1 Sengingenile esivandeni sami, dadewethu, mlobokazi wami; sengiyibuthile imure yami lesiyoliso sami. Sengizidlile izinhlanga zami loluju lwami; sengiyinathile iwayini yami lochago lwami.

Abangane

Dlanini, we zihlobo, linathe; nathani lizidele, lina zithandani.

Umlobokazi

2 Ngalala kodwa inhliziyo yami ivukile. Zwana! Isithandwa sami siyaqoqoda: “Ngivulela, dadewethu, sithandwa sami, juba lami, wena ongelasiyinga. Ikhanda lami ligcwele amazolo, izinwele zami zilobumanzi bobusuku.”

3 Sengisikhulule isigqoko sami ngisigqoke futhi na? Sengizigezile izinyawo zami ngibuye ngizingcolise futhi na?

4 Isithandwa sami sangenisa isandla saso embotsheni yomnyango; inhliziyo yami yagubhazela ifuna sona.

5 Ngavuka ngayasivulela isithandwa sami, izandla zami zajuluka imure, iminwe yami igeleza imure, phezu kwezibambo zekhiye.

6 Ngasivulela isithandwa sami, kodwa isithandwa sami sasesihambile; sasesisukile. Inhliziyo yami yadangala ngoba sesihambile. Ngasithalaza kodwa ngasiswela. Ngasimemeza kodwa kasisabelanga.

7 Abalindi bangibona belokhu behambahamba phakathi kwedolobho. Bangitshaya bangilimaza; bangihlubula bathatha ibhatshi lami, labobalindi bemiduli!

8 Lina madodakazi aseJerusalema, ngiyaliqonqosela uma lisifumana isithandwa sami lizasitshelani? Sitsheleni ukuthi mina sengiyathiswa luthando.

Abangane

9 Isithandwa sakho singcono ngakuphi kulezinye izithandwa wena omuhle okudlula bonke abesifazana? Singcono ngani isithandwa sakho kulezinye osungaze usigqabhazele kangaka?

Umlobokazi

10 Isithandwa sami siyakhazimula sincwaba, siyabonakala laphakathi kwezinkulungwane ezilitshumi.

11 Ikhanda laso liligolide elicengwe kakhulu; izinwele zaso ziyibulembu, zimnyama okwewabayi.

12 Amehlo aso anjengamajuba esezifuleni ezilamanzi, agezwe ngochago, amiswa njengamatshe engcebo.

13 Izihlathi zaso zinjengendima yeziyoliso ezikhupha iphunga lamakha. Izindebe zaso zinjengezimbali, ziconsa imure.

14 Izingalo zaso yimiqwayi yegolide elixutshwe ngekhrisolithe. Umzimba waso unjengophondo lwendlovu olulolongiweyo lwaceciswa ngamasafire.

15 Imilenze yaso yizinsika zelitshe eliqinileyo elibutshelezi nxa limiswe ezisekelweni zegolide elicengekileyo. Isithombo saso sinjengeLebhanoni, ngesekhethelo njengemisedari yakhona.

16 Umlomo waso uyibumnandi qobo lwabo; siyabukeka ngokupheleleyo. Lesi yiso isithandwa sami, yena umngane wami, we madodakazi aseJerusalema.